ဘစောတင် Monday, 04 April 2011 14:52
ထိုင်းနိုင်ငံ စမွတ်စခွန် ခရိုင် မဟာချိုင်တွင် ယနေ့နံနက် ၇ နာရီ ခန့်က အလုပ်သမား ကြိုပို့ကား ၃ စီးကို ဆယ်ဘီးကားကြီး တစီးက ၀င်တိုက်မိသဖြင့် ကားပေါ်ပါသူထဲမှ ၉ ဦးခန့်သေဆုံးပြီး ၃၀ ကျော် ဒဏ်ရာပြင်းထန်စွာ ရရှိသွားကြောင်း သိရသည်။
မဟာချိုင်တွင် မြန်မာအလုပ်သမားများ စီးလာသည့် ကြိုပို့ကား အတိုက်ခံရပြီးနောက် တွေ့ရစဉ်
ကိုခိုင်ကျော်ကျော် သည် မြန်မာရွှေ့ ပြောင်း အလုပ်သမားများကို ကူညီပေးသော အဖွဲ့ တခုဖြစ်သည့် မိုနိုထိုင်း အဖွဲ့ မှ စေ တနာ့ ၀န်ထမ်းတဦးဖြစ်ပြီး ကားတိုက်မှုကြောင့် သေဆုံးသူများနှင့် ဒဏ်ရာရှိသူများကို လက်ခံကုသပေးသည့် မဟာချိုင် ဆေးရုံသို့ ရောက်ရှိနေသူဖြစ်သည်။
“အခု ကျနော် ဒီမှာ ရောက်တော့ အလောင်း ၉ လောင်းရှိနေပြီ။ ဒဏ်ရာ အပြင်းအထန်ရလို့ အသည်းအသန်ကုနေတဲ့သူက ၃၀ ကျော်တယ်လို့ သိရတယ်”ဟု ၎င်းက ဆိုသည်။
ယင်း ၉ လောင်းအပြင် နောက်ထပ် ၆ လောင်း ရောက်ရှိလာသည်ဟု သိရကြောင်းလည်း ကိုခိုင်ကျော်ကျော်က ပြောသည်။
မြန်မာအလုပ်သမား ကိုအေးရွှေကလည်း“ဂါလန် စက်ရုံက နယ်ဝေးရပ်ကွက်မှာ ရှိတယ်။ အလုပ်သမားတွေက နေ့တိုင်း အဲဒီကို ဖယ်ရီ(ကြိုပို့ကား)နဲ့ သွားရတယ်။ အလုပ်ဆင်းဖို့ အသွားမှာ အတိုက်ခံရတာ။ စက်ရုံတရုံလုံး ပိတ်ပြီး အခု ဆေးရုံ ကို လာနေကြတယ်”ဟု ပြောပြသည်။
ဂါလန် ပုဇွန်စက်ရုံတွင် အလုပ်နေကြသော မြန်မာအလုပ်သမား ၇၀၀ ကျော် ရှိသည်ဟု သိရသည်။
မြန်မာအလုပ်သမား အရေး ကူညီဆောင်ရွက်ပေးသော Human Right Development Foundation (HRDF)မှ မြန်မာ ၀န်ထမ်း ဦးတိုးက“တလာကွန့်မှာက ရေက ရွှဲနေ တာ လေ။ ဆယ်ဘီးကားက ဆလစ်ဖြစ်ပြီးတိုက်တာ။ ဆယ်ဘီး ကားကြီး က အရှိန်နဲ့ မောင်းလာတာဆိုတော့။ တအားကြီး ဆောင့်တိုက်ပစ်သလို ဖြစ်သွားတာပေါ့။ ဒါရိုက်အတိုက်ခံရတဲ့ ကားမှာပဲ အလုပ်သမား ၅၀ ကျော်လောက်ပါတယ်။ အတိုက် ခံရတဲ့ ကားရဲ့ ဘော်ဒီကြီးတခုလုံး ပြုတ်ထွက်သွားတယ်။ နေရာတင် ပွဲချင်းပြီး သေတဲ့သူကသေ။ အရေးပေါ် ဆေးရုံပို့တာပို့ ပေါ့”ဟု ပြောသည်။
ထိုင်းနိုင်ငံအတွင်း အလုပ်လုပ်နေကြသော ရွှေ့ ပြောင်းမြန်မာ အလုပ်သမားများမှာ ၂ သန်းခွဲမှ ၄ သန်းဝန်းကျင် ရှိကြောင်း အလုပ်သမား အဖွဲ့ အစည်းများက ခန့်မှန်းထားကြသည်။
http://www.irrawaddy.org/bur/index.php/news/6121-2011-04-04-07-53-27
0 ( မှတ်ချက်ရေးချင်ရင် )